Fiets

Vandemiddag he’k even op ‘e fiets naor de Stellingwarver Schrieversronte in Berkoop west om nog wat spul op te haelen dat daor liggen bleven was tiedens Eupen Stal. Et was weer ien en al ellende mit de fiets. Almar gekrak. Hi’j trapte iederkeer deur in de versnellings 4, 5 en 6. Et slimste in 5. De ni’je fiets is zodoende een bron van argermis en stress, wiels de eerste 1.400 kilemeter prima verlopen binnen. Mar daornao was et mis en goed mis ok.  Ze hebben d’r in Wolvege al es naor keken mar et het niks hulpen. Ik zol doe een schoffien opschrieven wanneer as die ellende gebeurde en in welke omstaandighied. D’r is gien peil op te trekken. Vaeke gewoon a’k rustig an ’t fietsen bin. En soms gaot et ok allemaole goed. Mar ik hebbe vandemiddag drekt beld da’k weer langeskommen wol. Ie gaon op disse meniere niet genoeglik uut fietsen. Dat ik bin naoda’k weer thuus was uut Berkoop ok nog naor Wolvege west. Bi’j Ten Veen hebben ze drekt zegd dat et altied goedkommen zol. Dat was een geruststelling. Ze zullen now een ni’j aachterviel veur me bestellen, want zo kan et vanzels niet deurgaon. Daor bin ik bliede van. Ik hoeve niet deur te modderen. Mooi van Ten Veen. Ik hebbe zoks eerder bi’j iene aanders wel aanders mitmaekt. Doe he’k twie jaor laank ommekrummeld mit een verkeerde fiets.