Fier dyn eigen taal

Vandaege he’k mit kammeraod Haarm op stap west naor Sunt Jacobiperochie op et Bildt. Daor kwam in de Grote Karke et boek Fier dyn eigen taal uut, dat uutgeven wodde deur uutgeveri’je Frysk en Frij van Goasse Brouwer. Dichters konnen gedichten in alderhaande kleine taelen insturen veur dit boek. Et is een dik boek wodden. In et boek staon gedichten van 222 dichters over et thema tael in 70 verschillende kleine taelen in Nederlaand en Duutslaand. Et boek zicht d’r prachtig uut. Et eerste exemplaor wodde anbeuden an Arno Brok, de Kommesaores van de Keuning in Frieslaand. Hi’j hul ok een mooie toespraoke. D’r staon vuuf Stellingwarver gedichten in et boek. Mooie kaaste van Menno Dolstra, Et witte laeken van Harmen Houtman, Vuurtael van Stien van Anne (Christine Mulder), panta rhei van Willem Jan Teijema en Naachtboot van Johan Veenstra. Mar wie is Menno Dolstra? Ik hebbe waorlik gien idee. Of is dat een pseudoniem? De Grote Karke zat vol. De meensken kwammen overal weg. Hielemaole uut Limburg en uut de buurt van Bremen. Ik hebbe mit tal van meensken praot. D’r was een hiel pergramme om de prissentaosie van et boek henne dat prissenteerd wodde deur Margriet Brandsma. Een forum dat over kleine taelen praotte en tal van dichters leesden heur gedicht veur. D’r was ok een optreden van de Friese zanger Piter Wilkens. We bin ok in de kunde kommen mit de ni’je direkteur van de Stellingwarver Schrieversronte. Abel Darwinkel stopt nao vuuf jaor. Zien opvolger is Arjan Sterken, een aorige jongkerel van 33 jaor die Sallaans praot. Van him staot et gedicht Luustern in dit boek. Tussen de middag kregen we soep en lekkere bolties. Ik raekte mit een man uut Sunt Anne an de praot die mien kollums altied leesde en een protte genoegen beleefde an de stokkies waor poes Marja in veurkomt. Hi’j vreug a’k poes wel een peer aaien van him geven wol a’k weer thuus was. En dat he’k dus daon en poes vun et prima. Hieronder twie foto’s. Boven: in et middagschoft zit Haarm (Harmen Houtman) rechts veuran te eten en te praoten mit de Drentse dichter Gerrit Boer. Onder: d’r weren ok optredens van de Friese Daansers.