Johan Veenstra
Stellingwarver schriever en verteller
Plaetst op 30 jannewaori 2025.
Vandemiddag ha’k een fesien mit mien executeurs-testementair. As ieder van oons d’r weer vuuf jaor opzitten het, nemen we de jaorige mit uut eten. Dat deden we in et verleden altied op een aovend. Vaeke bin we bi’j Lenie west in heur resteraantien in Waskemeer. Doe dat sleut gongen we naor De Rustende Jaeger in Hooltpae. Mar ja, verschillende meensken beginnen d’r een hekel an te kriegen en rie in de auto in donker. Dat is vanzels de leeftied, al is die gieniene van oons nog an te zien. We hebben et now veur et eerste op een middag hullen. We vierden dat Fettje vleden jaor 80 jaor wodden is. Dat is heur ok niet an te zien. We hebben een high-tea had in et Theehuus in Grou. We veren daor zoemers vaeke langes in de boot, mar ik was d’r nog nooit in west. Et zat daor prachtig an et waeter en we hebben et d’r best had. We hadden et twienenhalf ure an tied. We konnen verschillende soorten thee nemen, mar we kregen ok een heerlik koppien soep en veerder weren d’r alderhaande lekkere zute en hattige happies. Heerlik! We hebben d’r van geneuten en alles schone op maekt. Et was zodoende een lekkere en veural ok ontspannen middag. We hebben gezellig praot en… de middag was zomar omme. A’k et platte van de voeten onderhole en ankem jaor 80 wor, wil ik ok wel een high-tea. Hieronder een foto die maekt is deur de vrouw die oons alle lekkers brocht. Fettje hadde zoas te zien is een mintgruun pakkien an en de drie manluden een net verstruperspakkien.