Johan Veenstra
Stellingwarver schriever en verteller
Plaetst op 6 oktober 2024.
In de loop van de morgen bin ‘k naor Dwingel reden. Bert en Jelly vierden dat ze vandaege 65 jaor trouwd weren. Dat bin de oolden van Sijtze, de omslagontwarper van mien boeken sund 2004. Doe ‘k van huus gong, drokte ‘k de autoradio an en luusterde naor een pergramme dat kwam vanuut et Museum veur valse keunst in Vledder. Dat zit daor in et oolde gemientehuus. Marlene Bakker zong daor lieties in et Grunnings en d’r wodde praot over valse keunst. En even laeter ree ik bi’j dat museum langes en daor stonnen een hieleboel auto’s. Et radiopergramme was nog in volle gang. Et fesien in Dwingel was in grand-kefĂ© De Brink. Et was drok in Dwingel vanwege et mooie weer. Ik moch twie keer een verhael vertellen. Veur en nao et eten. Dat he’k vuuf jaor leden ok daon. Doe hadden ze een fesien in Frederiksoord. We konnen vandaege van een heerlike brunch (waarm en koold) genieten. Et was zodoende een genoeglike dag! Hieronder Bert en Jelly op heur trouwdag.