Ferliezers

Vleden weke was Frits jaorig, dat ik hebbe him vandemiddag een bossien bloemen brocht en we hebben genoeglik bi’jpraot. Butendat hewwe elk twie hiempen gebak had, dat ik kan now wel mit een plakkien bolle minder toe.

Ik hebbe de Friestaelige roman Ferliezers van Rommert Tjeerdsma mit genoegen lezen. Froukje woont mit heur oolden in Liwwadden daor heur heit boekhoolder is. Zels krigt ze een baentien as typiste. Ze het verkering mit Jan die mar gien wark vienen kan. Ze twiefelt slim as ze wel oold mit him wodden wil. En dan brekt de oorlog uut. Jan gaot vri’jwillig naor Duutslaand te warken, mar as hi’j mit verlof thuuskomt gaot hi’j niet weeromme, mar duukt onder bi’j Froukje heur omke en tante. Froukje begint liekewel de hieltied minder veur him te vulen en dan komt ze Werner tegen. Een Duutse vliegenier die vanof et vliegveld van Liwwadden in zien Messerschmit de locht in gaot om allieerde vliegtugen daele te schieten. Dat is niet zo mooi, mar Werner is in wezen een hiele aorige en lieve man en ze raeken verliefd op mekaander. Komt dat wel goed? Ik vreug me al lezende iederkeer of hoe as de schriever hier een akseptaobel aende van maeken kon. Zoks kon veur allebeide vanzels nooit goed oflopen en zol allienig mar verliezers opleveren. En toch is d’r, as ze kaelknipt is as moffehoer, nog ien klein lochtpuntien en dat is mooi.