Feranderd Perspektyf

Wat een drokke dag… Vandemorgen om elf ure kree’k Sieger en Geertje uut Liwwadden op vesite. Ze brochten me heur ni’je boek Feranderd Perspektyf mit as ondertitel Ferbij de seedyk. Et is as omkeerboek (Bildts en Nederlaans) uutgeven deur uutgeveri’je Louise in Grou. In et Nederlaans hiet et Veranderd Perspectief – De Waddendijk voorbij. Ik komme hier laeter op weeromme. Et boek moet nog officieel prissenteerd wodden, dan zullen Douwe en ik de beide schrievers streng ondervraogen. Geertje hadde bolties en beleg mitneumen en ik hadde een pannegien tomatesop en drinkyoghurt klaorstaon, dat we hebben hier tussen de middag genoeglik mit ’n drienend eten. Daornao bin ‘k naor kapster Bertha in Et Vene gaon. Die het me et haor bekubbed en netties maekt, want ik moet zowel zaoterdag as zundag veur een stokmennig gelegenheden netties de deure uut. Bi’j Bertha he’k nao et knippen eten en drinken had: koppies thee mit hunning en mit lekkers d’r bi’j, een koppien sop en een croque madame. D’r gong vandaege dus mar weinig tied verleuren an et toemaeken van eten! Makkelik!

Vandaege is d’r krek as gister een Oekraïne-aovend in Ni’jhooltpae. Gisteraovend was d’r een infermaosieaovend in mfc De Ni’je Stienze angaonde et opnemen van vlochtelingen. Wat kan een klein dörp as Ni’jhooltpae op dat gebied doen? Vanaovend is d’r een Oekraïne-konsert in oonze mooie Nicolaaskarke. Et begint om acht ure. We kun genieten van et Nijkoor onder leiding van Klaas Pieter van der Laan. In verbaand mit de oorlog is d’r een wat anpast pergramme. De opbrengst is vanaovend veur Oekraïne. Ik gao hier vanaovend vanzels ok henne.