Feest van herkenning

Et was vandaege een feest van herkenning op ‘e Eupen Stal in Berkoop en al weer een verkooprekord. Nao de ziekenhuusperiode verkoop ik allemachtig vule. Ik wodde vandaege ok weer as Instituut anspreuken. Mooi is dat. Zoe’n kollum in de kraante het ok invloed op ‘e verkope. Jan en Riny van De Jouwer kwammen vandaege ok langes. De kuierkammeraod van zangeresse Grytsje Kingma maekte een selfie van oons tegere en dat stuurde hi’j naor Grytsje. In et kommende seizoen zullen Grytsje en ik ok weer tegere optreden mit een Fries/Stellingwarfs pergramme. De zuster van Gerda van der Veen kwam ok bi’j me. Ze kocht een boek veur Gerda die mit mi’j in et eerste bestuur van de Stellingwarver Schrieversronte zat. Misschien hiette et doe nog wel Stuurgroep Stellingwarfs. We vergeerderden wel bi’j Gerda heur oolden, aachter et waeterpompstesjon van Appelsche. Dat was begin zeuventiger jaoren. Wat is dat lange leden. En dan he’k ok nog praot mit een zeune van Roelf en Mieke Oosterhof, van vroeger uut de Stellingwarven. Laeter woonden ze in Peize. Ik hebbe wel es bi’j heur eten. Roelf en ik zatten in diezelde zeuventiger jaoren veur de Schrieversronte in de Fryske Kultuerrie. Ik wor oold… Mieke en heur zuster Sijke (Post) kwammen van De Oosterstreek. Ze zongen bi’j et mingd koor van Buil. Heur breur Wilt Post was de dirigent. Ik hebbe d’r nog wel een langspeulplaete van. Wat komt d’r op zoe’n middag Eupen Stal een protte naor boven borrelen.

Hendrik en Beitske hadden in de loop van de middag mit de camper bi’j mi’j op ‘e oprit staon zuld. Mar ze belden dat ze now op zundag kommen zullen. Dan willen ze mitien de Eupen Stal bekieken. Ik zal zorgen da’k heur dan aovens een beste prakke stamppot zoerkool veurzetten kan.