Feest in Berkoop

Vanaovend krigt schriever en kammeraod Harmen Houtman de H.J. Bergveldpries veur zien jaorenlange vrotteri’je veur en in et Stellingwarfs. Dat gebeurt allemaole in de karke van Berkoop. Abel Darwinkel, de direkteur van de Stellingwarver Schrieversronte zal de aovend eupenen en dan lest Pieter Jonker, de veurzitter van de jury, et juryrepot veur. Daornao wodt de pries, een penning die indertied maekt is deur Guus Hellegers, an Harmen uutreikt deur Klaas van Weperen, de veurzitter van de Schrieversronte. En dan komt Harmen mit zien daankwoord. Daornao is d’r een opvoering van De koolde tocht over de Winterreise van Schubert mit et Nijkoor, Anne Doornbos (Drents schriever en verteller), Klaas Peter van der Laan (dirigent en bariton), Mirjan Groen (pianiste) en Johan Veenstra (schriever/dichter). Ik hope dat et een mooie aovend wodt daor de meensken mit genoegen op weerommekieken zullen. Ik zal now votdaolik naor de karke toe veur een rippetisie. Tenor Han Warmelink is op et laeste mement ziek wodden en daor zo’k De liereman, et laeste lied van de Winterreise mit rippeteren. Dat doe ik now mit Klaas Peter van der Laan. Et pergramme moet dus wat veraanderd wodden.

Hieronder een foto van de prieswinner. Disse foto is deur Lenus van der Broek maekt op 22 feberwaori 2019 in oons mfc De Ni’je Stienze in Ni’jhooltpae. Harmen Houtman krigt van oold-Schrieversronte-veurzitter Ype Dijkstra et eerste exemplaor van zien boek As ik kiezen moch.