Faunatorens

Vandemorgen he’k weer naor fysiosport west in Wolvege en daornao he’k honderd meter veerderop bi’j Jarmo en zien moeder een koppien drinken had. Ik hebbe zien ni’je pelletkachel bekeken. Ik kende de naeme, mar hadde gien idee wat et percies was en hoe et d’r uutzag. Ien ding is zeker: wat geft dat ding een waarmte! Jarmo kan de kommende winter behaegelik waarm zien wark doen! Vandemiddag het Anke de boel hier in huus opredded. Poes en ik kun et now weer smerig maeken.

Vanaovend he’k overleg mit meensken van de Voegelwaacht Hooltpae e.o. Dat e.o betreft de dörpen Ni’jhooltpae en Der Izzerd. De Voegelwaacht is van doel en zet in die drie dörpen een faunatoren. Die van Der Izzerd staot d’r trouwens al. De JVS is van doel en geef daor een subsidie veur. Daor gao ‘k vanaovend dus mit Leo en Monique over praoten. Een fauatoren is een soortement betimmering op een hoge paol daor bi’jveurbeeld voegels, vleermoezen en insekten een schoel- en/of bruudplak vienen kunnen. Dat liekt et bestuur van de JVS een prachtig plan!