Fantoompoezen

Ik hebbe vandaege wat exemplaoren van Et liek in de Lende bi’j de Schrieversronte in Berkoop weghaeld veur de verkope. Bi’j de waarme bakker he’k daor lekkere koeken kocht veur de vesite die morgen komt. En… ik hebbe verhaelen rippeteerd veur et optreden van de kommende zaoterdagaovend op ‘e Blesse.

Ik hebbe de verhaelebundel Fantoompoezen van Rascha Peper lezen. Ze schreef indertied jaorenlaank verhaelen over meensken en dieren (veural katten) op ‘e aachterpagina van de NRC.  In Fantoompoezen staon heur beste autobiografische verhaelen en die heb ik mit groot genoegen lezen. Et bin prachtige verhaelen. Van de laeste twie verhaelen in de bundel schrok ik. Daor schreef ze in dat ze naor et ziekenhuus mos veur een daarmonderzuuk (mi’j wel bekend) en dat et niet goed leek. Et weren verhaelen uut september en oktober 2012. Ik hebbe doe drekt op internet keken. Rascha Peper raekte een peer maonden laeter weg. Wat een mal aende van dat mooie boek. Ik wus niet iens dat ze niet meer leefde. Jaoren leden hebbe ik heur roman Russisch blauw uut 1995 al es lezen. En ik hebbe in de negentiger jaoren, mit heur toestemming, een verhael van heur vertaeld in et Stellingwarfs. Dat verhael Spiet staot in mien boek Verrassend Stellingwarfs.