Fanny Blankers-Koen

Gister schreef ik in mien dagboekstokkien dat Fanny Blankers-Koen niet allemachtig hadde rieden kon, mar wel hiel hadde lopen. Dat is vanzels wel zo, mar et was now ok weer niet een hakkenkrokke. Ze kon wel degelik best op redens veuruutkommen. De 19-jaorige Fanny Koen dee in 1940 mit an de Elfstedetocht. Et was een vreselike tocht mit zowat onbegaonber ies deurdat d’r een protte sni’j op lag. Een aende  noordelik van Franeker wodden een protte tochtrieders van et ies haeld. Ze kregen liekewel allegeer wel een Elfstedekrusien. Fanny Blankers-Koen hadde dus wel zoe’n bekend en kostber krusien! Dat wus ik dus niet, mar et wodde me maild deur Hedman Bijlsma uut Drachten. En ja, die man wet echt alles van en over et hadrieden en geft daor een boel lezings over!

De Olympische Winterspeulen bin veurbi’j en ik hebbe me d’r slim mit vermaekt. Nederlaand het et nog nooit eerder zo best daon. We staon dadde in de medalliespiegel mit tien goolden, zeuven zulveren en drie broonzen medallies. Eerste is Noorwegen wodden mit 18-12-11 medallies en twiede de Verienigde Staoten mit 12-12-9 medallies.

Ik bin vandemiddag op vesite west in Et Vene bi’j Haarm en Jacob. Kammeraod Haarm is vandaege 75 jaor wodden. Hi’j komt al een meenskeleven laank mit vuuf jaor verschil aachter me an. Ik hope dat zoks nog lange et geval blieven zal. Dan biwwe d’r allebeide temeensen nog!