Extra veurstellings Sultan

Vandaege he’k de kollum die ‘k drie daegen leden in klad schreven hebbe bewarkt, verbeterd en uuttikt. Butendat he’k op verzuuk van filmmaeker Steven de Jong ok nog een kollum in klad schreven. Die za’k over een peer daegen wel es bewarken en verbeteren. Ik hebbe mooi ni’js over de film Sultan van Bercoop. Op een peer kaorten nao bin alle kaorties van de tien veurstellings now al uutverkocht. Vanwege dat grote sukses kommen d’r now zes veurstellings bi’j. Op vri’jdag 27 november, zundag 29 november, zundag 6 december, vri’jdag 11 december, vri’jdag 18 december en zundag 27 december. Kom de film (mit een hiel pergramme d’r bi’j) bekieken! Laot je dit niet ontkommen! Kom naor de filmkarke in Hooltwoolde, et Hollywood van Stellingwarf! En neem je man, vrouw, kammeraod, kammeraodske, buurman, buurvrouw en eventueel je maitresse mit! Hieronder ien van de mooie filmposters. Hier ligt Bauke heerlik op bedde tussen Tine en Geke in. Bekiek de agenda van www.filmkerkwolvega.nl