Extra dagboekstokkien

We bin te plak en de wifi warkt. Dit is dus et twiede dagboekstokkien van vandaege. We hebben vandemorgen ofscheid neumen van Gerda en bin om 11 ure in de auto stapt en over Diever, Dwingel en Hoogevene naor Ommen reden. Daor hewwe tussen de middag een twaelfuurtien had in brasserie Tante Pos in et oolde postkantoor. We hebben ok een kuier deur et stattien maekt. We hebben doe een mooie route reden over Lemele, Lemelerveld en Holten naor Lochem. Onderwegens hewwe best wel beheurlik regen had. Et was op een gegeven mement nog mar 13,5 graoden. In Lochem was et 17,5 graoden. We hebben eerst bosschoppen daon in een supermark en bin doe naor oons vekaansieverblief reden: vekaansiepark Bosrijk Ruighenrode. We wodden verwelkomt deur oonze gaastvrouw Mylène Harmsen. We hebben een prachtig huus in de bos. Een huus mit drie husies (wc’s) en twie badkaemers. Zoks kost vanzels et ien en aander, mar dan hej’ ok wat. Nao et eten, een kaant en klaore maoltied uut de supermark, hewwe een kuier deur et park maekt. Et is hier wondermooi. Hieronder twie foto’s. Een foto van ien van de meulen van Ommen an de Vecht en oons huus in Lochem.