Extra dagboek: Braand

Dit is een vroeg en extra dagboekstokkien betreffende de braand van vannaacht, schieve tegenover me. Even nao middernaacht mo’k even van bedde en doe ‘k et gedien losdee, zag ik dat de vlammen hoge uut et dak sleugen van Binnenweg nommer 6. Ik hebbe begrepen dat de bewoner, Marcel, niet thuus was. D’r leek me drekt al gien redden meer an. Ik zag de eerste meensken de weg al opkommen, kon dus wel annemen dat 112 al beld was. Even laeter was de weg vol blauwe lochten. Wat een schrik. Ik hebbe de kleren antrokken, poes opsleuten, en bin doe de weg oplopen. Mit aandere buren hewwe staon te kieken. De braandweer hadde de hoge vlammen al rap doofd, mar iederkeer stak de braand de kop weer op. De braandweermannen stotten dakpannen van et dak. Daor zat dan weer vuur onder. Et was griezelig om te zien en et geluud te heuren van kepot springende ruten. Om half 3 bin ‘k weer op bedde gaon en vandemorgen zag et d’r zo uut. Zie de foto hieronder. De bedriefsauto van Marcel die d’r vannaacht nog ston, was vandemorgen vot. Wat een ramp. Ie zullen alles toch kwietraeken. Dat is verschrikkelik. Op 27 september 2018 was d’r braand op Binnenweg 8, pal tegenover me. Doe sleugen de vlammen niet uut et dak, mar deur de rookontwikkeling het de buurman van 78 die braand doe niet overleefd.