Executeursdag

Ien keer in et jaor is et Executeursdag, dan kommen mien executeurs-testementair bi’j mi’j over de heerd. Vandaege was dat weer et geval. Ik hadde een botterkoeke mit een vulling van dreugde proemen bakt en die vul d’r goed in.We hebben genoeglik bi’jpraot en wat zaekelike dingen over de toekomst bepraot. As ik d’r niet meer bin… Daornao hewwe van direkteur Abel Darwinkel een rondleiding kregen deur et ni’je onderkommen van de Stellingwarver Schrieversronte in Berkoop. Hi’j het oons ok op petret zet bi’j mien gedicht Kruuspunt. Vervolgens biwwe naor hotel Lunia kuierd en daor hewwe allemaole wat drinken en een twaelfuurtien had. Hiel lekker! Hieronder de foto die Abel van oons maekt het. Van links naor rechts: Fettje, Jelle, Johan en Pieter.