Eupening Winterlocht

Vandemorgen he’k mit de auto naor fysiosport west. Et regende as de zee en ik mag graeg fietsen, mar ik laote me niet nat regenen. Nao de sport he’k een bakkien drinken bi’j Jarmo had en doe he’k nog naor de biebeltheek en de supermark west.

Gisteraovend bin ‘k naor de eupening van Winterlocht in Berkoop west.We kwammen bi’j mekaander in Le Brocope, daor zat Appie Tjalma vroeger in. Peter Hiemstra, de veurzitter van Eupen Stal, hiette oons welkom. Wethoolder Esther Verhagen van Oost-Stellingwarf eupende Winterlocht vervolgens. Mit et keunstenersduo Kroft en Smids hewwe doe de aanderhalve kilemeter deur et dorp kuierd. D’r bin mooie dingen te zien. Prachtig is de walvis die over de mure van de karke zwemt. Op et Appie Tjalmaplein is et krek as bi’j’ op et straand. De golven rulen op je an. Hier en daor staon mooie teksten op muren. Netuurlik koj’ zomar argens een peer geities tegen. Dat kan ok haost niet aanders in et dorp van de geitefok. Mien gedicht Krek as Kandinsky staot op een mure van de oolde pasteri’je daor Daan Zethoven now woont. Naost et gebouw daor de Schrieversronte eerder in zat. Op et gebouw waor de Schrieversronte now in zit, is Kandinsky echt te zien. En wat is Hotel Lunia mooi! Gao mar henne te kieken. Et is elke aovend t/m zundag 22 meert. Van half achte tot tien ure. Hieronder twie foto’s die ‘k maekt hebbe. Boven: zo mooi zicht Hotel Lunia d’r uut! Onder: zomar een mooie zin van Gerardjan Rijnders.