Eupen Stal

Zaoterdag over een weke begint keunstmannefestaosie Eupen Stal in Berkoop. Ok dit jaor stao ik daor mit mien boeken. Vleden jaor ston ik d’r ok, doe was mien boek Et liek in de Lende krek uutkommen en he’k daor doe een protte van verkocht. Van de 30 daegen ston ik d’r vleden jaor 28. Op die twie aandere daegen het Fettje me prima vervongen. Ik stao d’r dit jaor mit Pieter. In de grote zael van et gebouw van de Stellingwarver Schrieversronte is een mooie tentoonstelling die deur et Centrum veur Prentkeunst van de Stichting Nobilis inricht is. Pieter zit daor in de hal mit Nobilis-boeken en ik zitte bi’j him mit mien eigen boeken. We verkopen vanzels ok aandere Schrieversronte-boeken. We wisselen mekeer die 30 daegen of. Soms is Pieter d’r allienig, soms bin ik d’r allienig, mar we bin d’r ok wel vaeke tegere. Dat is temeensen de bedoeling. As de gezondhied mar wat mitwarken wil… Pieter en ik bin beste verkopers. As et moet verkopen we daor alles wat los en vaaste zit. We hopen jim daor te zien!

D’r kwam gister een kaorte van Giel, Koosje, Frank en Rimmy. Ik kriege de groeten van heur vanuut Hotel Waldcafé in Mayrhofen in et Oostenriekse Zillertal.