Eupen Stal uut aende

Gisteraovend he’k mien citaoten in et Stellingwarfs vertaeld die René Koster me stuurde. Ze kommen in et artikel over mi’j op ‘e website van Omroep Frieslaand. En dat allemaole in verbaand mit et interview dat René mit me had het en dat op zundag 13 augustus op ‘e radio te beluusteren is. Ik hebbe de vertaeling vandemorgen nog es bekeken en die doe naor René maild.
En vandemiddag is de keunstmannefestaosie Eupen Stal in Berkoop losgaon. De 52ste edisie! Et was geweldig mooi weer, mar et was ok chaotisch. De pin bi’j de kiosk dee et niet. Heb dus altied gewoon geld bi’j je, ik kan et niet vaeke genoeg zeggen. Now mossen ze iederkeer naor de slaachter vliegen as die heur helpen kon mit wisselgeld en zo. Ik ston d’r vandemiddag allienig veur, ik bemande de boekekraom van de Schrieversronte en de boekekraom van Nobilis. Butendat verkocht ik ok de prenten van Karel Wetselaar die Nobilis daor tentoonstelt en te koop het. Dat ik bin now echt bekof, want et was smoordrok. Een vrouw wol mit me op ‘e foto en een man drokte me een briefien in de haand. Ik mos beslist alderhaande websites bekieken en dan zo’k op ‘e hoogte kommen van hoe d’r mit verkiezings ommerommeld wodt. Mien hemel nog an toe… Ik hope werachtig niet da’k daor meer van dat soort mannen over de heerd kriege. Vrouwluden die mit me op petret willen bin allemaole van hatte welkom! Mar dan ok graeg een boek van me kopen!