Eupen Stal uut aende zet

Vandaege is de jaorlikse keunstmannefestaosie Eupen Stal in Berkoop uut aende zet. Et leven het van now of an een aander ritme. Ik ete morgens om half twaelf waarm eten, aanders komt daor niks meer van. Ze hebben me donderdag uutlegd hoe a’k via een zieddeure in oons ni’je gebouw kommen moet, mit een sleutel en een kode. En… hoe a’k de grote glaezen buterdeure en een binderdeure eupen en weer dichte kriegen moet. Ik hebbe d’r ok pepieren mit plaeties d’r op bi’j kregen hoe et allemaole moet. Zoks is veur mi’j een drege klus. Et lokte me vandemiddag eerst van gien kaant. Mar uuteindelik bin ‘k in et gebouw kommen en he’k de aandere deuren op et laeste ok los kregen. Meensken snappen zoks niet, die bin vule haandiger. Mar ik bin now ienkeer niet goed in zokke dingen. Mien hassens douwen dit soort infermaosie as spam an de kaant. Ik vraoge om mar een klein betien begrip. Ik kan ok dingen die aandere meensken niet kunnen. Ik bin bi’j de Kuunder langes naor Berkoop fietst en ok weer bi’j de Kuunder langes naor huus toe. Et was brodsig weer. Ik hebbe trouwens geweldig goed verkocht en de eerste klap is een daelder weerd. Morgen za’k drekt nao de Eupen Stal op bezuuk in et ziekenhuus.