Eupen Stal uut aende

Van vandaege of leef ik veurlopig in een aander ritme. Dat betekent morgens om half 12 waarm eten en dan om even nao 12 ure op ‘e fiets naor Berkoop veur de boekeverkoperi’je op ‘e Eupen Stal. Vandaege is de Eupen Stal dus uut aende gaon mit et mooiste weer van de wereld, dat et was votdaolik slimme drok. Ik vuulde me op mien vaaste plakkien drekt weer as een vis in et waeter en hebbe beheurlik verkocht. As et elke dag zo blift bin ik hiel tevreden. Et mooie is ok daj’ mit alderhaande meensken een praotien maeken kunnen. Ik kreeg ok nog een mooi kedogien! Van Jannes Westerhof kreeg ik een mooi boek veur al mien vri’jwilligerswark. Et is et boek Blauwblomme van Binie Bos. Op ‘e aachterflappe he’k al lezen dat et over een mysterieuze man gaot. Dan vien ik et grif mooi, want ik bin gek op mysterieuze mannen. Ik hope jim ok op Eupen Stal te zien, beste dagboeklezers en -lezeressen. En jim weten now dus al wat ik mooi vien: boeken verkopen en kedogies kriegen! Ik bin zokrek bi’j de Kuunder langes weer naor huus gaon. Ik bin van doel en doe dat elke dag op disse meniere, dan krie ‘k daegs toch nog een betien frisse locht.