Eupen Stal (8)

Zo slecht as et gister was vanwege de regen, zo goed gong et vandaege op ‘e Eupen Stal. Drekt an et begin van de middag wodde et al drok. Zok weer as vandaege is vanzels ok schitterend Eupen Stal-weer. Ik hebbe now weer goed verkocht. De eersten die vandemiddag bi’j me langeskwammen weren Peter en Janneke uut Burgum. Ik vien et mooi as tal van vrunden en goeie kunde in Berkoop bi’j me komt te kieken. In de grote zael van de Stellingwarver Schrieversronte is een tentoonstelling mit wark van grafikus Tom Thijsse. D’r hangt een prachtige prente mit de titel Last train to San Fernando. Die titel leut me niet los. Ik hebbe op internet keken en et is ok de titel van een lietien dat zongen wodde deur Johny Duncan and the Bluegrass Boys. Bedoeld wodt hier de stad San Fernando op Trinidad. Vandemorgen om goed vier ure wodde ‘k wakker en doe begon die titel me weer deur et heufd te spoeken. Dit moet ik aenlik bruken in een verhael, liekt me zo toe. Et zal dan ien van de langere verhaelen wodden daor a’k de laeste drie jaor mit an de gang bin. En et zol gaon kunnen over een ooldere vrouw die mit heur vule jongere gigolo de laeste trein naor San Fernando nemt. Ik hebbe d’r now al nocht an en gao daor mit an de slag. Mar ja, wanneer…