Eupen Stal (5)

Vandemorgen he’k op ‘e fiets naor Marian in Wolvege west veur fysio. Daor stop ik now mit. Donderdag begin ik an een aander behaandeltrajekt. Vandemiddag he’k op ‘e fiets naor Berkoop west en ik bin zokrek bi’j de Kuunder langes weer naor huus fietst. Zodoende he’k vandaege toch nog 33 kilemeter fietst. Doe ‘k vandemorgen bi’j Marian zat te waachten, kwam d’r een man uut de behaandelkaemer die me herkende. Hi’j vertelde me dat hi’j cv-monteur is, overal in Frieslaand komt en altied Stellingwarfs praot. En dan krigt hi’j hiel vaeke te heuren dat hi’j krek zo praot as de man die vroeger op ‘e radio was… Dat bin ik dus. Vandemiddag zat ik mit Pieter op ‘e Eupen Stal. Aj’ daor zitten kriej’ ok van alles te heuren. Gister vertelde een vrouw oons dat ze vroeger les had hadde van Henk Bloemhoff. As die man nog leefde? Now, ja dus. Neffens die vrouw zol Bloemhoff dan now toch wel tegen de negentig an zitten. We hebben zegd dat hi’j dat nog niet is, mar dat hi’j wat dat anbelangt aorig onderweg is.