Johan Veenstra
Stellingwarver schriever en verteller

Eupen Stal (3)

Plaetst op 23 juli 2022.

Vandaege is de keunstmannefestaosie Eupen Stal in Berkoop uut aende zet. Ik bemande de boeketaofel in et gebouw van de Stellingwarver Schrieversronte mit Pieter en Peter. Vandemorgen was d’r in et Centrum veur Prentkeunst op ‘e Fochtel een bi’jienkomt in verbaand mit et uutkommen van et boek Tom Thijsse prentenmaker. Een schitterend uutvoerd boek over de bekende grafikus Tom Thijsse uut Muden. Een vuuftig meensken woonden de prissentaosie van et boek bi’j. Ik was daor niet bi’j, mar de breurs Jeroen en Tim Krabbé weren d’r wel! Een protte van die meensken kwammen middags naor de tentoonstelling mit wark van Thijsse in et gebouw van de Schrieversronte. Et vandemorgen verschenen boek heurt in wezen bi’j de tentoonstelling. Et was drok op ‘e eerste dag van de Eupen Stal. Et was vanzels ok prachtig weer! Om zes ure bin ‘k bi’j de Kuunder langes weer op huus an fietst. Morgenmiddag bin Pieter en ik  tegere in Berkoop.