Eupen Stal

De temperetuur leup vandemiddag op naor 29 graoden. An et aende van de weke kriegen we weer twie daegen mit 33 graoden. Ik beginne die hitte zo staorigan zat te wodden. Ik bin vandemiddag even naor Berkoop west. Et was de laeste dag van Eupen Stal. Ik hadde daor alle zundaegen staon zuld om boeken te verkopen, mar dat is niks wodden. Dat wodt nooit weer wat. Fettje zat daor now op ‘e zundaegen. Ik hebbe even bi’j heur keken en daor een koppien drinken had. Ik bin niet lange bleven. Ik bin vandaege wat dwiel en et was me daor vusen te waarm en te drok. Over De Hoeve bin ‘k weer naor huus gaon. Lekker onder de bomen deur. Fettje hadde nog wel een mooi verhael. Vleden weke zag een vrouw mien laeste boek liggen en doe zee ze dat Johan Veenstra ok al dood was. Fettje zee dat dat niet zo was. Mar de vrouw hul vol. Ze wus et zeker. Johan Veenstra was al even dood. En… hi’j was trouwd mit Marga Kool. Dat verzin wodt vaeker maekt. Marga was trouwd mit de Drentse schriever Jan Veenstra en die is inderdaod even leden al weer uut de tied raekt. Ikke dus nog niet, mar ooit krigt die vrouw geliek. Hieronder een foto die ‘k vandemiddag maekt hebbe in Berkoop: Fettje mit twie beste klaanten!