Eupen Stal

Gister is keunstmannefestaosie Eupen Stal in Berkoop uut aende zet en ik ston niet in et gebouw van de Schrieversronte bi’j een boeketaofel veur de verkope van Stellingwarver boeken. Ik hebbe dat een jaormennig mit groot genoegen zes keer in de weke daon, mar dat brak me de laeste peer jaor op. Et was te drege en dan belaande ik in et ziekenhuus. Ik zol van ’t jaor de zundaegen percent wezen, mar now brekt et me ok op. Ik heure daor te wezen, zo vuult dat, mar et wodt te zwaor. Want dat is et as een protte meensken je kennen en allegeer even mit je praoten willen. Dan ha’k om zes ure de breuke wel uut. Ik hebbe allemachtig vule verkocht op Eupen Stal. Zeker tussen de twintig- en vuventwintigduzend euro. Et was prachtig wark en ik misse et hiel arg. Mar ik gao et niet weer doen. Aanderen moe’n et now van me overnemen. Van ’t jaor zullen meensken nog wel es naor me vraogen. Ankem jaor niet meer. We bin in wezen niet meer as veurbi’jgangers.

Ik hebbe vandemiddag weer een fietstochien van veertig kilemeter maekt. Over De Hoeve, Steggerde en deur de De Eese, over Ni’jensliek en Frederiksoord naor Wilhelminaoord. Daor he’k een brotien hamburger behaffeld en bin doe weer op huus an gaon. De temperetuur leup op naor 26 graoden. In Steggerde lag een grote koppel koenen in ’t schaad. Die dieren hadden et ok waarm. Zie twiede foto hieronder.

Ik kreeg gister een foto toestuurd van Dick en Bonnie uut Drachten. Die bin op et ogenblik op vekaansie in et gooldgele Mecklenburg-Vorpommern. In et noorden van Duutslaand dus. De bouwboeren bin daor drok doende in ’t zaod. Zie de foto hieronder.