Eupen Stal (14)

Et was gister en vandaege drok in Berkoop. Ik was daor vandemiddag mit Pieter. Nao et inzakken van et tal bezukers en de verkopen vanwege de hitte he’k now weer hiel goed verkocht. Vandemiddag kwammen Harry en Frans langes. We hebben gezellig even praot, mar daor was niet zovule tied veur. Wodt dus vervolgd! En morgen is et dan de laeste dag van Eupen Stal. Et is best wel een hiele klus, mar ik hebbe et weer mit genoegen daon. Ie doen et argens veur! Ik hadde van Pieter al een mooi boek over grafikus Tom Thijsse kregen veur al mien wark de laeste maond veur de Stichting Nobilis. Vandaege kree’k van et bestuur van Nobilis een allemachtig groot boeket bloemen. Prachtig!

Meensken die overal mar hennevliegen op vekaansie doen de netuur/et milieu daor gien goed mit. Mar ja, iederiene wil nao de slimste corona de hiele wereld weer over. Mar d’r bin ok slim verstaandige meensken. Ik kreeg een mooie kaorte van volk uut Ni’jhooltpae die now op vekaansie binnen in… Appelsche. Dat kan dus ok! Ze schrieven o.e. Als wij zwerven in de buurt van Appelscha is ’t voor ons al mooi genoeg. Ik kriege de groeten van Gerdie, Eise, Alie en een betien van Annie. Dat laeste vien ik raodselachtig. Wie is Annie? En waoromme krieg ik daor niet de volle groeten van, mar een betien? Vint Annie mi’j niet aorig genoeg? Wat now toch weer een drege vraogen! Misschien slaop ik hier vannaacht wel niet van! Of is Annie lichtkaans een huusdier dat me een klein betien geft?