Eupen Stal (12)

Krek as laestdaegs he’k de slaopkaemer beneden weer in gebruuk neumen. Boven is niet te wezen deur de waarmte, daor zo’k now niet slaopen kunnen, en beneden is et lekker koel. Dat ik ligge naachs beneden onder een laeken en poes Marja ligt op et voetenaende.

Krek as gister bin ‘k vandaege bi’j de Kuunder langes naor Berkoop gaon en over De Hoeve weerommefietst. Gister kronkelde d’r op et fietspad naost de Kuunder een ringslange. Mooi om te zien! Die dingen kun allemachtig goed zwemmen. Dat he’k wel es zien in een poele op ‘e Delleboersterheide. Et eerste pat van de middag wa’k allienig, laeter kwam Pieter me gezelschop holen. Die het et ok raozende drok in et Centrum veur Prentkeunst op ‘e Fochtel. Daor het et nog nooit zo drok west as tiedens de tentoonstelling mit wark van Jeanne Bieruma Oosting. Et volk komt uut et hiele laand weg. Vandaege hadde hi’j volk uut Almen dat daor ok bleef te eten. De kommende twie daegen bin ‘k weer allienig in Berkoop. D’r kwam ok vandaege vule minder volk as aanders, mar ik hebbe toch meraokelse goed verkocht. In et laeste half ure kwam d’r een vrouw uut Zwitserlaand mit Stellingwarver roots. Die vrouw het vleden jaor een hiele protte van me kocht en dat dee ze vandaege weer. Mien dag was zodoende meer as goed. Et mag dudelik wezen da’k gek op zokke vrouwluden bin. Ik hebbe ok een slim aorig en vermaekelik gesprek mit een man en een vrouw uut Hollaand had… Daor schrief ik dus nog een kollum over. Daor in Berkoop te zitten is altied een bron van inspiraosie!

Mar ja, d’r bin ok meensken die niet zo hadde warken as ik doe. Die bin op vekaansie! Ik kreeg onderstaonde kaorte van Jan, Diana, Leon en Raymond. Zi’j zitten op et ogenblik in Braobaant, mar misschien bin ze ok al weer thuus in Aalten…