Eupen Stal (10)

Vandemiddag zat ik weer de hiele middag op ‘e Eupen Stal, zoas praktisch alle middaegen. Eerst wa’k daor mit Peter, laeter allienig. Et was gezellig drok in Berkoop en ik hebbe meraokelse goed verkocht. Tiedens de route kun meensken op twie plakken naor et husien, mar wiethoevaeke vraogen ze as ze bi’j oons naor ’t husien kunnen. Nee dus. We besteden d’r al zovule tied an en awwe daor op ingaon zollen, zollen we an et aende van de dag de husies ok nog schonemaeken moeten. Dat doen we dus niet. Mar ja, as meensken veur een best bedrag kopen en ze willen toch graeg naor et husien… Dan mag dat van mi’j en dat is vandemiddag twie keer gebeurd. Mar alle knieperds die niks kopen… Die kun niet bi’j oons naor ’t husien! Verschil moet d’r wezen!

Ik kreeg vandaege een kaorte van Klaas, Catrien, Jan en Durkje uut et mooie Ootmarsum in Twente. En in Ootmarsum bin de schilderi’jen van Ton Schulten te zien! Ik bin daor een liefhebber van. Op ‘e kaorte staot et schilderi’je Aan de oever uut 2015.