Eupen Dag

Louwgien braande d’r vandaege ommeraek op, mar ik hebbe toch een heerlike fietstocht van 57 kilemeter maekt. Doe ‘k thuuskwam wa’k nat van ’t zwiet. Ik bin bi’j de Kuunder langes naor Oosterwoolde fietst en doe deur dat plak naor De Fochtel. Daor was et Eupen Dag in en om et Centrum veur Prentkeunst van de Stichting Nobilis. Et was d’r een drokte van belang. Overal stonnen  kraompies mit keunsteners die heur wark te koop hadden. In et gebouw was een tentoonstelling en Pieter hul daor een lezing. Ik hebbe daor wat ommekuierd en hebbe d’r ok wat drinken en een peer bolties had. Doe bin ‘k weer op ‘e fiets stapt en over Appelsche, Else en Boekelte staorigan weer op huus an gaon. Wat bluuiden de eerpels onderweg prachtig! Hieronder een foto die ‘k vandemiddag maekt hebbe aachter et Centrum veur Prentkeunst. Op ‘e veurgrond een keunstwark van Hein Mader.