Johan Veenstra
Stellingwarver schriever en verteller

Eters

Plaetst op 5 meie 2022.

Gisteraovend he’k naor de prachtige film Suite Francaise keken. Ik hadde de film al wel es eerder zien, mar ik hebbe d’r toch weer slim van geneuten. Et verhael speult in Frankriek, in et begin van de oorlog. Lucile woont bi’j heur strenge schoonmoeder. Ze waachten totdat de man van Lucile, die gevangen neumen is, weerommekomt. Mar dan wodden ze dwongen om Bruno, een Duutse luitenaant, bi’j heur in huus te nemen. Lucile begint Bruno staorigan aorig te vienen en hi’j heur… Dat is vraogen om perblemen. Mar wat een mooie, ontroerende film!

Veur et eerst sund een peer jaor krie’k weer eters. In de coronatied het hier nooit meer as iene toegeliekertied west te eten. Meer was niet verstaandig in verbaand mit et besmet raeken. Mar now kommen d’r hier aanst drie heren van staand: Harry, Frans en Jan. Ik bin om de kastdaegen henne bi’j heur west te eten. Ik zal ze aanst eerst vergaasten op koffie/thee mit wat lekkers d’r bi’j: botterkoeke mit een vulling van abrikozen en cupkekies mit een vulling van tutti frutti. Ik hebbe et spul zels bakt. Daornao is d’r an draank gien gebrek. Ik hebbe meerdere flessen wien klaorzet… En dan is d’r een hopelik lekkere maoltied. Ik hope dat et lokt is, want ik hadde dat ok een peer jaor laank niet meer toemaekt. Eerst kriegen we gruuntesop mit ballegies volgens een oold Ni’jhooltpae├»nger recept. En dan is d’r een ovendschottel mit een boel lekkers in laogies. Onderin stokkies sukadelappies mit wat ketjap manis d’r over, dan een laogien eerpelpuree, een laogien kookte spitskool, een laogien prei mit champignons, een laogien eerpelpuree. En dat alles bestri’jd mit raspte keze. En awwe allemaole mit et lief op ‘e liest bi’j de taofel zitten bin d’r nog alderhaande toeties. Et iene nog lekkerder as et aandere. Daenk ik… Ik hope mar dat disse eerste eteri’je nao de corona goed beteert!