Etentien

Vandemorgen hebben de beide tuunmannen d’r west en die hebben de tuun (weer) hatstikke netties maekt. En now zit ik d’r zels slimme netties bi’j en waachte totda’k aanst ophaeld wor mit een auto. Vleden jaor kon in verbaand mit corona mien 75ste verjaordag niet vierd wodden. Mar now nemen een stokmennig goeie vrunden me vanaovend as kedogien, meer as zestien maonden laeter, asnog mit uut eten. We gaon naor resteraant De Rustende Jaeger in Hooltpae en ik kan de beurs dus thuuslaoten. Dat kon gister ok al! Ik moet d’r vanaovend dus ok weer van profiteren en d’r flink wat deurzetten! Ik bin vanzels van doel en neem de duurste gerechten en draankies die ze daor op ‘e menukaorte staon hebben. Veur de wissighied he’k vanzels altied een plestieken poedegien in de tasse, zoda’k stiekem ok een stok vleis of zo mit naor huus nemen kan. As et me wat al te groot en te vule is. Ik zal dat slim diskreet doen, zodat ze heur niet veur me hoeven te schaemen. Mar et wodt ongetwiefeld een slim genoeglike aovend!

Hieronder nog een foto die ‘k gister vanof de Frisian Queen maekt hebbe. Dit is hotel-resteraant Ie Sicht. Awwe zoemers mit de boot et waeter op binnen, zitten we hier geregeld op et terras om van een twaelfuurtien te genieten. Et zit daor prachtig!