Eten toemaeken

Gister hadde ik een spannegien appelvinken oftewel karsebieters op et voer. Ik zag d’r iederkeer al iene, mar ze bin now dus mit ’n beidend. Dat is goed, want d’r moe’n karsebieterties blieven en daor kun zi’j mit ’n beidend wat an doen. Omdat et naachs nog hatstikke koold was ha’k toch nog wat zunnebloemepitten hennestrijd en daor kwammen ze op of. Hiel arg mooi! D’r zit iederkeer ok al een mesien veur ien van de nustkassies te kieken. Ik wete niet as die ok al iene het, mar ze bin van hatte welkom. D’r moe’n vanzels ok mesies blieven.

Omda’k morgen gien tied hebbe, he’k vandaege al een allemachtige flut eten toemaekt omda’k vri’jdagaovend drie eters over de heerd kriege. Die eters kennende weet ik dat d’r dan naor alle warschienlikhied nogal wat deurgaon zal, dat ik hadde uut veurzorg een halve mudde eerpels insleugen. Dat moet toch genoeg wezen, zoj’ zo zeggen. Butendat he’k ok nog mit een artikel veur et tiedschrift De Ovend an de gang west.

Vandaege kwam over de post de trieste tiedinge van et uut de tied raeken van Gaetano Celso op ‘e Lemmer. Hi’j is 86 jaor wodden. Mit zien vrouw Vera heb ik de jaoren deur bi’j rieten kontakt had. De dood hoolt nooit ok mar iene dag schoft.