Et Woold omme

Vandemorgen om negen ure zat ik al op ‘e fiets en om half twaelf wa’k al weer thuus. Et wodde vandemorgen vlogge waarm. In die tied he’k een mooi tochien van 36 kilemeter maekt. Ik bin deur de Mildamster Poolder gaon en doe he’k et fietspad bi’j de Kuunder langes neumen naor Ooldeschoot/Et Vene. Vervolgens bin ‘k naor Oranjewoold en Brongerge gaon. Daor he’k de fietspaeden pakt die boven Mildam langesgaon. De Fuotpaden en et Imke Klaverpaad. Prachtige fietspaeden. Op een baankien he’k een boltien behaffeld. Ik kwam in Ni’jehoorn uut en bin daor de Butenweg langesfietst en doe naor Berkoop en  naor huus. Een route meerst in et schaad van bomen. Ik zag mooie dingen onderweg. Ik was nog mar een peer honderd meter op pad doe ‘k al een iekhoorntien en de kaant van de weg zag. An de Slingerweg op Der Izzerd bluuiden op een bepaold plak een protte klaprozen en roggebloemen. Even wiederop scharrelde een moeder ente mit een toom al aorig grote jongen omme. Ik hebbe een foto maekt van et mooie karkhof van Brongerge mit de grafkelder van de grafelike femilie Van Limburg Stirum.