Et waeter op

Naodawwe eregister een fietstocht maekt hebben, hewwe vandaege mit de boot et waeter op west. Van vandemorgen half elf tot even nao zes ure vandemiddag. Et was vandemorgen eerst mar 15 graoden. Ik hadde een lange broek, trui en jassien an. Mar doe et 19 graoden wodde mit volop zunne, he’k me verstruupt. Een kotte broek, een shirtien en een vessien. We bin om Warga henneveerd naor Grou. En van daor over De Veenhoop naor Eernewoolde. Daor hewwe wat ommekruusd en tussen drie en vier ure hewwe eten op et terras van hotel-resteraant Princenhof. We hebben elk een stormbreker had. Een twaelfuurtien dus: een kop heerlike pestosoep, een plakke bolle mit een kroket en een plakke bolle mit schinke en een bakt ei. Et was wel hiel toevallig dat Haarm en Jacob daor an een high-tea zatten mit een koppeltien vrunden van Jacob. Nao et eten biwwe veerderveerd over et Preenses Margrietkenaal in de richting van de Fonejacht brogge en van daor weer naor et noorden toe. Hieronder twie foto’s van een mooie dag. Et mooie dörp Grou en een mooie boot die we tegenkwammen tussen Grou en De Veenhoop.