Johan Veenstra
Stellingwarver schriever en verteller

Et Vene

Plaetst op 10 jannewaori 2023.

Vandaege biwwe d’r lekker tussenuut west. Eerst hewwe naor modehuus Rinsma op ‘e Gediek west om te winkelen. Ik hebbe twie boezeroenen kocht mit rood en gruun d’r in om bi’j truigies an hebben te kunnen. Ze weren 50 percent goedkoper vanwege de uutverkoop. Ik bedoele vanzels van sale. Butendat ha’k nog een bon van heur kregen in verbaand mit mien verjaordag. Dat bin dus goedkope boezeroenen! We kregen daor ok wat drinken mit een hiempien appelgebak d’r bi’j. Van daor biwwe naor Et Vene reden om Museum Heerenveen te bekieken. Ik docht dawwe daor in een ure wel klaor wezen zollen, mar we bin d’r zowat drie uren west. We troffen daor een vri’jwilliger die oons in et Stellingwarfs rondleided het. Hi’j kwam oorspronkelik van Else en vertelde dat ik bi’j him in de boekekaaste ligge. Dat was hiel mooi. Krek as in Museum Dokkum hebben ze in Museum Heerenveen ok prachtig zulver. Mien verjaordagsetentien hewwe had in resteraant De F√Ľke in Echten. De vrouw van et resteraant praotte ok Stellingwarfs. De zalm was d’r heerlik! We weren d’r nog nooit eerder west, mar dit is een goed adres! Hieronder nog een foto die ‘k vandemiddag maekt hebbe in et museum. Zo woonden de meensken vroeger. Lao’we dus mar niet klaegen en knarpen.