Et regende goold

In de laeste 24 uren hewwe d’r nog vier goolden medallies bi’j wunnen op ‘e Olympische Winterspeulen. Ik hebbe alles mitmaekt. Vlak veurdat Douwe en ik gisteraovend eten zollen in resteraant De Rustende Jaeger in Hooltpae hewwe daor op et parkeerterrein op ‘e autoradio heurd hoe as Antoinette  Rijpma-de Jong de 1500 meter wun. Aovens he’k zien hoe de shorttrackers bi’j de oflossing ok goold wunnen. En zokrek zag ik hoe as Jorrit Bergsma en Marijke Groenewoud beidend de massastart wunnen. Geweldig! Jens van ’t Woud uut Suntjehannesge wun op disse Olympische Speulen mar liefst drie keer goold. Dat is mar een peer keer eerder vertoond. Ard Schenk wun drie keer goold in Sapporo 1972, Yvonne van Gennip dee dat in Calgary 1988 en Irene Schouten in Peking 2022. Nog meer? Ien keer het d’r iene vier keer goold wunnen. Dat was Fanny Blankers-Koen in 1948 in Londen. Zi’j kon niet allemachtig hadde hadrieden, mar meraokels hadde lopen.

Vandaege he’k mit de belastingboel an de gang west. Ik hebbe alles bi’j mekaander gadderd en alderhaande dingen optelt: inkomsten, onkosten en giften. Now kan de boel aanst naor Joop van administraosiekantoor Veenstra in Wolvege en dan reddet die him d’r veerder wel mit.

Hieronder nog een foto die ‘k vleden deensdag in Grunningen maekte. Dit is et peerd van Ome Loeks. Et beeld is in 1959 maekt deur Jan de Baat en et staot op et stesjonsplein. We kennen allemaole dat lieten wel: Peerd van Ome Loeks is dood, hailendal dood.