Et platte van de voeten

Vandemorgen om even nao acht ure wa’k al weer bi’j Voetmax in Beetsterzwaog. De steunzolen laggen klaor. De man daore zee dat et eerst een peer weken wennen moet. Dat is ok zo, et vuult een betien vremd. Ik moet daor in november 2027 weer kommen veur kontrole en zo. Dat duurt nog een best schoft. A’k d’r dan nog mar bin. A’k dan nog mar in Beetsterzwaog kommen kan. Ik zal mien best doen en hool et platte van de voeten onder… Daoromme he’k vandemiddag naor Marian veur fysio-massage west. Nao negen keer stoppen we d’r now even mit. Ik blieve elke dag thuus oefenings doen en ik gao vanzels naor fysiosport. Vandewinter gao ‘k dat twie keer in de weke doen omda’k dan zowat niet fietse. Ik moet in beweging blieven. Ik marke best wel da’k van ’t jaor energie inleverd hebbe. Mar ik geve et nog lange niet op. Vleden vri’jdag is Ethel Caterham in Engelaand 117 jaor wodden. Jeanne Calment uut Frankriek wodde indertied 122 jaor en 164 daegen. En oonze eigen Hendrikje (Henny) van Andel-Schippers wodde 115 jaor en 62 daegen. Zi’j wodde in 1909 geboren, etzelde jaor as mien moeder, in Kloostervene (De Smilde). Ze zal dus grif de Smildeger variaant van et Stellingwarfs praot hebben. Zo’k heur dat naodoen willen? Dan he’k nog 35 jaor te gaon. Dan kan ‘k nog hiel wat steunzolen verslieten. Ik kan me niet veurstellen dat et mooi wezen zol. Ok al zo’k helder van geest blieven. Iederiene die ‘k goed kend en mit ommegaon hebbe is dan al lange dood. Wat een vreselik triest idee. Ik zol dan ongetwiefeld ok nog een oorlog mitmaeken moeten en een protte snikhiete zoemers. En a’k dat allemaole overleven zol… Zol d’r dan nog wel es iene bi’j me kieken?

Nao de massage van Marian he’k vandemiddag nog wat bosschoppen daon en mit de fietstassen vol bin ‘k bi’j de Lende langes weer naor huus gaon. Hieronder een foto die ‘k daor maekt hebbe van een opni’j uutgreuven oolde kronkel van de Lende.