Johan Veenstra
Stellingwarver schriever en verteller
Plaetst op 8 juni 2023.
Vandemorgen om acht ure wa’k al bi’j de huusdokter. Die het twie plakkies mit stikstof behaandeld en dat moet over drie weken weer. En dat allemaole om te veurkommen da’k veur de zeuvende keer huudkanker kriege. Doe ‘k krek weer thuus was, belde Abel, de direkteur van de Stellingwarver Schrieversronte. Mien ni’je boek Naozoemerlaand was daor deur de drokker ofleverd. Dat is mooi betied, et boek komt op 14 juli uut. Abel het me drekt wat exemplaoren brocht en et zicht d’r echt fantastisch mooi uut! Ik zal et vanaovend even bladziede veur bladziede konterleren. Mar: et ni’je boek is d’r!
In de loop van de morgen hewwe de fietsen aachter op ‘e auto zet en we bin naor de Driewegsluus reden. Daor biwwe begonnen an een prachtige fietstocht van 43 kilemeter. Over de Lendediek, bi’j Jelle zien oolde huusstee langes, naor Ossenziel. En van daor over al die mooie broggies naor Kaelenbarg. En doe veerder naor Blokziel. Daor hewwe op et terras van resteraant Preens Maurits wat drinken had mit een hiempien Blokzielder Brokke. We bin veerderfietst over Baarlo, Nederlaand en Wetering naor Ooldemark. Van daor over Blesdieke, de Sas en bi’j et Wiede van de Lende langes naor de Driewegsluus. Daor hewwe op et terras van et paviljoen lekker eten had. Hieronder nog een foto van een prachtge fietsdag. Dit moois is te zien in de Weerribben.