Et Loo

We bin d’r vandaege een dag op uut west. We zollen aenlik naor Batavia Stad, mar om in de koolde deur die winkelstraoten te sjouwen… Dat is dus niet deurgaon. We hebben Peleis Et Loo in Apeldoorn bekeken. We hebben daor eerst wat drinken mit gebak had. We weren d’r wel es vaeker west, mar de tentoonstellingszaelen onder et veurplein bin d’r nog niet zolange. Fantastisch wat ze daor onder de grond bouwd hebben. We hebben daor de tentoonstellings bekeken. Ok de mooie verlengde tentoonstelling Queens mit prenten van Andy Warhol. We hebben et peleis zels ok hielemaole weer deur west. Een vrouw die vraogen beantwoordde en uutleg geven kon, vreug awwe ok wat te vraogen hadden. Now, aenlik niet. Ze begon toch wat te vertellen, mar ik kon zo mit heur mitpraoten. Van techniek weet ik niks, mar dit allemaole wel. Ze ston versteld. Ik hadde daor drekt wel rondleider wodden kund. Mar ja, ik wone nogal een aentien uut de buurt. Zoks vien ik dan wel mooi. Doe we vernammen dat ze uut Twente (Enter) ofkomstig was hewwe veerder Twents en Stellingwarfs tegen mekaander praot. Dat is toch ok mooi! We hebben vanaovend lekker eten in grandkefé ’t Stadhuys in Wolvege. Hieronder twie foto’s die ‘k in Apeldoorn maekt hebbe. Boven een petret van keuning Willem I. Onder ien van de petretten die Andy Warhol van Beatrix maekt het. Ik vien dat hiel mooi!