Et laompien dat een varken is

Vanaovend is d’r in de bovenzael van de biebeltheek in Oosterwoolde een aovend mit schriever Pim Lammers en een zekere Johan Veenstra. Et begint om acht ure. Pim Lammers komt van oorsprong van Oosterwoolde. De aovend is orgeniseerd deur Alles Rondom Taal, een warkgroep die verbunnen is mit de Stichting Keunstwarf. Veur et schoft hoolt Pim Lammers een lezing over zien wark. In et schoft kun d’r boeken kocht wodden bi’j de boeketaofel van Bruna en kun die boeken ok signeerd wodden. Nao et schoft lees ik de Stellingwarver vertaeling veur van Pim zien prenteboek Het lammetje dat een varken is. Butendat wor ik ok interviewd. De vertaeling van dit mooie kienderboek he’k in de eerste helte van 2021 al maekt. De tekenings in et boek bin van Milja Praagman. In et Stellingwarfs hiet et boek now Et laompien dat een varken is. Lammers zien boek was et eerste Nederlaanse transgender-prenteboek. Hi’j kreeg d’r een Zulveren Griffel veur! Morgen gaon Pim en ik naor twie schoelen in de Stellingwarven. Dan wodt et boek officieel prissenteerd. Et boek kon uutgeven wodden deur financiële hulpe van de perveensie Frieslaand en de Johan Veenstra Stichting.