Et laompien dat een varken is (2)

De bovenzael van de biebeltheek in Oosterwoolde zat gisteraovend praktisch vol veur et pergramme mit Pim Lammers en mi’j. Pim het veur et schoft mooi verteld over zien wark as kienderboekeschriever. Zien boek dat ik now vertaeld hebbe in et Stellingwarfs was in 2017 et eerste transgender-prenteboek van Nederlaand. En now is Et laompien dat een varken is et eerste transgender-prenteboek in et Stellingwarfs! In et schoft hewwe een protte verkochte boeken signeerd. Nao et schoft heb ik de vertaeling veurlezen en ik bin interviewd deur Philomène Bloemhoff. Verschillende vrouwluden wollen mit Pim en mi’j op petret. Philomène het ok een foto van Pim en mi’j tegere maekt. Die is onderan dit stokkien te zien. Pim het de Nederlaanse versie van et boek beet, ikke de Stellingwarver versie.

Vandemorgen bin Pim en ik op stap west mit direkteur Abel Darwinkel van de Stellingwarver Schrieversronte. Op twie schoelen is de Stellingwarver vertaeling prissenteerd en wel op obs Boekhorst in Oosterwoolde en de Veensterschoele in Noordwoolde. Om 9 ure begon et in Oosterwoolde, om elf ure in Noordwoolde. In Noordwoolde kwam Hans Salverda van et SSR-bestuur ok te kieken. We hebben iederkeer een les vuld. Pim vertelde prachtig over et boek en de kiender gongen d’r hielemaole in mit. En uuteindelik was et dus ok doodgewoon dat een jonge verliefd wodt op een jonge. Zoas Pim op Jasper. Mar d’r bin ok nog altied schoelen in dit mooie laand daor Pim niet welkom is. Stel je veur! Ie zollen die aarme kiender es op een idee brengen kunnen! En dat mag vanzels niet! Op disse Stellingwarver schoelen was alleman enthousiast. Ik hebbe iederkeer weer de Stellingwarver vertaeling veurlezen. En Abel het alle kiender van groep 3 een boek kedo geven. Alle kiender van groep 3 van alle 37 Stellingwarver basisschoelen kriegen dit boek kedo! D’r bin ongeveer duzend boeken drokt. Wie dit biezundere boek hebben wil, moet d’r bi’j wezen! Nao een prachtige aovend en een al lieke prachtige morgen wa’k wel toekocht. En now neem ik rust en hoop ik dat de meensken mi’j even mit ruste laoten.