Et kan now nog

Gister was et een drokke dag, dat ik hebbe vandaege mar een kleine fietstocht van 34 kilemeter maekt. Et kan now nog. Ze zeggen dat et ankem weke haast wodt en 12 graoden koolder as et now is. Verschrikkelik. Ik wil dit weer graeg holen. Mar et kan in de loop van september en zels begin oktober nog hiel mooi weer wezen. Ik bin vandaege over De Hoeve en Steggerde naor de Heerlikhied De Eese fietst. En doe over Wilhelminaoord en Noordwoolde weeromme naor huus toe. Ik hebbe niet ansteuken om argens te eten, mar hadde een peer plakkies bolle in de fietstasse. Ik was krek veur de regen thuus, et was mar krek op et nippertien.

Van Jelle en Gerda kwam d’r een peer daegen leden een appien mit een foto die ze maekt hebben in et mooie Denekaamp. Ze zatten daor in een husien op een vekaansiepark daor Jelle en ik ok al es zeten hebben. Op ‘e foto staot de waetermeule tegenover kesteel Singraven. Et is daor zo prachtig. Ik zol daor graeg nog es kieken willen. Krek as op Vlielaand, daor zo’k ok zo graeg nog es henne willen. Veurdat zoks niet meer kan.