Et dorp dat zweeg…

Ik hebbe gister mooie reakties kregen op mien kollum Imperator in de Liwwadder Kraante. Een man uut Kollum mailde o.a.: jo skriuwen hat jow unstjerlik makke. Dat is toch mooi!

We bin d’r vandaege op uut west naor Ni’jlaande/Nieuwlande. Dat is een dorp tussen Hoogevene en Emmen. Daor hewwe et Onderdukersmuseum bekeken, dat daor in een oolde schoele zit. Mooi en indrokwekkend. D’r is een tentoonstelling over Johannes Post, ien van de bekendste verzetsstrieders. Post hadde in dat dorp een boerderi’je. Hi’j het zien dappere verzetswark indertied mit de dood bekopen moeten. In Ni’jlaande zatten in de oorlog een protte onderdukers. Jongen die niet verplicht warken wollen in Duutslaand, mar ok een hieleboel joodse meensken. D’r zat ok een Amsterdams joongien dat in dezelde klasse zat as Anne Frank. Anne schreef in heur laeter zo wereldberoemde dagboek dat ze laeter wel mit him trouwen wol. Anne het de oorlog niet overleefd, dat joongien wel. Ontroerend was ok de film daor de kiender van Johannes Post in over heur vader vertellen. In Haovelte is een kezerne naor Post nuumd. Een dorp dat zweeg het een protte te vertellen… Gao d’r henne, bekiek alles, laot je ontroeren. En ie zullen beseffen dat meensken nooit van et verleden leren. Almar weer stomme fouten maeken en aachter ophitsers en raosbekken an lopen en daor op stemmen. Facisme en antisemitisme nemen almar meer toe, ok in oons laand. Dat is meer as droevig. Het et Duutslaand van Hitler niet genoeg west? Op ‘e weerommereize naor huus hewwe een slag deur et mooie Oold Aalden maekt en we hebben om half viere een twaelfuurtien had bi’j Family in Appelsche. Hieronder twie foto’s van et Onderdukersmuseum in Ni’jlaande.