Ereburgerpetret onthuld

Vandemiddag is dan in et gemientehuus in Wolvege mien petret onthuld omda’k in 2021 deur de gemienteraod benuumd bin as ereburger. Ik was vandemorgen eerst nog even naor kapster Bertha in Et Vene west. Dat mien haor zat in ieder geval goed. In de gauwighied he’k bi’j heur ok wat eten had. Ik was vandemiddag wel wat zenewaachtig, hadde koolde voeten en hanen. Mar alles is mooi en goed verlopen. Et was een hatstikke mooie middag. Wat geweldig dat Jan en Diana hielemaole vanuut Aalten in de Aachterhoek kommen weren om dit mit te maeken! En Egbert en Rieke uut Velsen-Zuud! Hulde! Burgemeester André van de Nadort eupende de bi’jienkomst. D’r weren verschillende wethoolders en raodsleden en vanzels een hiel koppeltien goeie vrunden. Kammeraod en oold uutgever Pieter Jonker hul een mooie toespraoke. Hi’j vertelde wat over alle zeuven ereburgers van de gemiente. Zo kreej’ een mooi historisch overzicht. En doe hebben de burgemeester en ik de vlagge van West-Stellingwarf die over mien petret hong d’r ofhaeld. Een mooie foto! Rob de Wind het me indertied op petret zet bi’j de Scheenesluus. Toch aenlik wel et mooiste plakkien van de gemiente. Daornao moch ik mien toespraoke holen. Wat mooi ok dat Remco Heite en zien vrouw Nans d’r weren. Remco wodde in 2005 tot ereburger benuumd. We hangen naost mekaander en kun zodoende alles wat d’r in de raodszael gebeurt in de gaten holen. Nao et officiële pat konnen de meensken me fielseteren, wat mit mekeer praoten, genieten van de happies en de draankies en vanzels et petret bekieken. Ik kreeg ok nog een peer mooie bossen bloemen en alderhaande kedogies. Dat hadde vanzels hielemaole niet hoefd. Van de gemiente kreeg ik nog een penning mit et waopen van West-Stellingwarf en de tekst Johan Veenstra Ereburger van Weststellingwerf 18 maart 2021. De penning ligt in een staander van glas. Ik hadde al eerder een oorkonde kregen. Mit een klein koppeltien volk hewwe laeter nog wat naopraot. Ik hebbe ok nog wat overbleven happies mit naor huus kregen, aanders wodde et toch mar votgooid. Ik bin doe gauw naor huus reden, hebbe een trui antrokken en bin doe naor et Buurthuus in Noordwoolde reden. Daor kregen de vri’jwilligers van de Stellingwarver Schrieversronte een heerlik stamppotbuffet anbeuden. Lekker. We kregen ok nog een boekebon. Even nao negen ure wa’k weer thuus en now schrief ik dit dagboekstokkien nog. Een laet stokkien… Hieronder een foto die vandemiddag maekt is deur Lenus van der Broek. Hier onthullen de burgemeester en ik mien fotopetret.