Er staat een huis aan Schelde

Ik hebbe vandemiddag vesite had uut Arnhem: Deli, Elroy en kleine Miles die al weer drie jaor is. Wat wet dat kiend al vreselik vule meer van de wereld as ik wus doe ik drie jaor was. Hi’j hadde een atlas bi’j him daor een protte lanen in stonnen mit alderhaande dieren die in die lanen veurkommen. Hi’j kent van lanen en dieren haost al die naemen. Ik hadde vroeger nog nooit van Namibië, Australië en koalabeerties heurd. Ik vun et hiel mooi dat ze bi’j me west hebben.

Now ik de hiele serie Geheim Dagboek van Hans Warren veur de dadde keer leze, heb ik tussendeur ok even een dichtbundel van him nog es lezen: Er staat een huis aan Schelde. Doe Warren uut de tied raekte in 2001 zatten d’r in zien literaire naolaotenschop honderden gedichten die nooit publiceerd weren. Misschien omdat hi’j ze niet goed genoeg vun of omdat hi’j d’r nog wat an veraanderen wol. Alles staot now in de kluus van de Zeeuwse Biebeltheek in Middelburg. Zien levenspartner Mario Molegraaf het wat gedichten bi’j mekeer zocht veur de bundel Er staat een huis aan Schelde. Et bin gedichten uut de jaoren veertig van de veurige ieuw. De Twiede Wereldoorlog en kot daornao. In de bundel staon tekenings van de dichter. Ik vien et hiele mooie gedichten. Et is hiel herkenber Hans Warren en alles wat bi’j him heurt. Zien kust en Zeelaand. Zien voegels en Borssele. En veural et huus op ‘e Zeediek. Zien oolde huus. Ik schreef vaeke over mien oolde huus, Warren schreef vaeke over zien oolde huus. Et witte huus op ‘e Zeediek in de buurt van waor now de kerncentraole staot. Even het hi’j indertied in Amsterdam woond omdat hi’j daor warken wol. Et ienige mooie van Amsterdam vun hi’j de viadukten daor laete in de aovend nog treinen overhenne reden. Treinen op weg naor Zeelaand, naor huus, zien oolde huus. In zien gedaachten was hi’j vaeke onderweg naor zien oolde huus, ok al was dat laeter al lange ofbreuken. Et mooie gedicht Er staat een huis aan Schelde begint zo:

Er staat een huis aan Schelde

Hoog op de brede dijk,

Onwrikbaar in de stormen,

Wit in de zon te kijk.