Enkhuzen

We bin vandaege lekker een dag op stap west naor de prachtige stad Enkhuzen. Op ‘e hennereize regende et flink, mar in Enkhuzen was et zunnig en heerlik weer. We hebben de auto op et parkeerterrein bi’j et treinstesjon zet. Op etzelde plak daor Jelle en ik de auto ok hennezet hebben doe we een peer jaor leden van Edam naor huus reden en onderwegens in Enkhuzen ansteuken hebben. We hebben vandemiddag in et stesjonsresteraant eerst waarme poeiermelk mit een hiempien gebak had en bin doe de stad inkuierd. We hebben et binnenmuseum van et Zuderzeemuseum bekeken en de beide tentoonstellings die daor op et ogenblik binnen. Iene over verhaelen van de zee en iene over et 75-jaorig bestaon van et Zuderzeemuseum. We zaggen een boel mooie films over vroeger, over et leven in de steden en dörpen an de Zuderzee. Mit zowat alle meensken in klederdracht. Dat leek toch wel arg mooi! We hebben d’r lange ommedangeld. Et museum zit in een prachtig oold gebouw uut 1625. Wat is Enkhuzen mooi mit al die oolde, rieke gebouwen uut de tied van de VOC en de Goolden Ieuw. Ik begriepe dawwe dat now as een foute tied zien moeten, mar we hebben d’r dan toch mar schitterende steden an overhullen. Op ‘e weerommereize naor huus hewwe lange tied allemachtig vule waeter had. Wat regende et verschrikkelik hadde. We hebben vanaovend eten bi’j de Koepelbos in Berkoop. Hieronder een foto die ‘k vandemiddag maekt hebbe in et mooie Enkhuzen.