Engerlingen

Et kan mar zo dat de buurt daenkt dat ik gek an ’t wodden bin en da’k binnenkot klaor veur Franeker bin. Ondaanks de beste regenbujjen was ik gister en vandaege veur ’t thuus mit de tuunslange de plaanten waeter an ’t geven. Dat doe ‘k morgen ok nog. D’r zitten naemelik best wat engerlingen (larven van de iekmulder) veur et huus in de tuun en die vreten de wottels van plaanten en struken op. Die gaon op disse meniere dood. En hoe wies a’k bi’j de meitied ok mit iekmulders bin, dit kan vanzels niet. Tuunman Rino het een schoffien leden al es onder een peer plaggen keken. Et was allemaole van dat spul. Vandaege het hi’j d’r west om de tuun een behaandeling te geven. Veur en nao die beurt moet de tuun flink nat maekt en hullen wodden. Vandaor mien wonderlike gedrag. Mien moeder zee altied: Aj’ gek wodden komt et je in de kop an. Daor is dus (nog) gien spraoke van.

Vandemorgen het Jarina hier op vesite west. Ze brocht liende boeken weeromme en het aanderen weer mitkregen. Ik kreeg drie boeken van heur kedo. De vrouwen van Hendrik de Jong van Steffie van den Oord, Op slag van twaalf van Sape Zwama en Gekmanswaark van Bé Kuipers. We hebben mitien wat bi’jpraoten kund. Poes kreeg trouwens een poedegien mit kattesnupies van Felix van heur. Aenlik is Whiskas zien mark, mar dit vun hi’j ok slimme lekker. Poes is gek op meensken die lekkers veur him mitnemen. Aandere meensken meugen hier ok wel kommen en hi’j vint et ok wel goed as ze him aan aai geven. Mar veerder bin ze vanzels niet echt van belang.

Ik hebbe vandemiddag vanzels naor de Troonrede keken. As de politici now es deden wat de keuning zee. Perberen om meer mit mekeer saemen te warken. Dan zol et stokken beter gaon. Now is et de laeste jaoren gewoon een troep. Ze bakken d’r niks van. Lopen vot as et drege wodt en kommen gien stap veerder. En et laand stikt van de perblemen en de wereld staot omtrent in de braand. Nao et tillevisiekieken bin ‘k naor Wolvege west om bosschoppen, ik hebbe boeken naor de biebeltheek brocht en een grote deuze vol boeken naor de kringloop. Now is d’r weer wat ruumte in de boekekaasten en kan ‘k weer ni’je boeken kopen. Want boeken koop en lees ie nooit genoeg.