Else omme

Et blift mar prachtig fietsweer, dat daor profiteer ik in hoge maote van. Zodoende he’k vandaege een tocht van 53 kilemeter maekt. Ik bin vandemorgen bi’j de Kuunder langes naor de sluus onder Ni’jberkoop fietst en doe deur de prachtige buurtschop Iegypte naor Twietel. Wat staon de baarms her en der vol mit prachtige wilde bloemen. Veural mooie kemille en margrieten. Ok an de weg naor Else. D’r moe’n vanzels nog vule meer wilde bloemen kommen. Ik hadde in Else op et terras wat eten en drinken wild, mar et zat daor wat op ‘e wiend. Ik bin veerderfietst over Boekelte en hebbe doe dat prachtige fietspad naor Buil neumen. En doe over De Oosterstreek en over de Dwasvaortweg naor Noordwoolde. Daor he’k wel wat eten en dronken op et terras van et resteraant in et oolde tramstesjon. Ik hebbe twie plakkies bolle mit geitekezekroketties had. Heerlik! Nao et eten bin ‘k naor Berkoop fietst en doe weer bi’j de Kuunder langes naor huus toe. Hieronder een foto die ‘k onderwegens neumen hebbe van de karke en de klokkestoel van Buil.