Eldersloo

Gister schreef ik dat d’r een foto onder mien stokkien ston en dat was in eerste instaansie niet zo. Ik snapte d’r niks van, want ik hadde de foto wel verstuurd. Et bleek te gaon om een .jfif bestaand en dat wodde niet ondersteund. Webmaster Pieter het de foto d’r asnog onderzet. Zokke mannen bin heur gewicht in goold weerd!

Ik bin vandemorgen naor fysiosport west en Jaap en Andrea hebben de tuun daon maekt. Ze reden krek vot doe ‘k thuuskwam. Ik hebbe een protte last van spieren/gewrichten. Ankem weke za’k twie keer naor fysiosport en ik zal ok weer naor Marian veur fysio/massage.

Ik hebbe et boek Eldersloo lezen. Drentse schrievers an de reize. Et is een boekien mit reisverhaelen van negen Drentse schrievers dat uutgeven wodde in 1991 naor anleiding van de vuufde Drentse Boeketiendaegse. Et bin stok veur stok mooie verhaelen van Dick Blancke, Jannie Boerema, Ab Drijver, Marinus Elting, Albert Haar, Erik Harteveld, Lammert Huizing, Marscha van Noesel en Roel Reijntjes. De meersten ken ik wel of hebbe ik kend. Want ja, niet iederiene van disse negen leeft meer. Dick Blancke het hier wel es bi’j me thuus west. Hi’j was ien van de eerste Drentse schrievers die hiel eupenlik en hiel mooi over homoseksualiteit schreef. Hi’j zit now al wel 25 jaor mit zien partner Ron Vos op Mas Taillet in Prats de Mollo. Dat is op ‘e greens van Frankriek en Spanje. Vekaansiegangers kun bi’j heur terechte! Et boekien is al 35 jaor oold en hiel arg aktueel. Et verhael De hel opnij van Ab Drijver begint zo:

En laot ik nou miend hebben, dat ’t waor was. Laot ik nou miend hebben dawe ’t fascisme votdaolijk herkennen zulden, as ’t de kop weer opsteken zol. Dawe ’t nooit meer vergeten zulden hoe as ’t maanks een wolf weden kan. In schaopskleren. Gott mit uns. Again and again.