Elburg

Veur de broodneudige ontspanning biwwe d’r vandaege heerlik op uut west. We bin naor et oolde haanzestattien Elburg west en daor hewwe de Zaandverhaelen bekeken. In de loodsen van een oolde blikkefebriek is al dat moois te zien. De beste zaandkeunsteners van de hiele wereld hebben daor zaandskulpturen maekt. Zoe’n 35 beeldhouwers hebben d’r meer as 25.000 manuren an besteded en ze hebben 4.000 m3 zaand uut et Markermeer bruukt. De tentoonstelling Zaandverhaelen is iedere dag, et hiele jaor deur, te bekieken. En… et is prachtig! Ie lopen in wezen dwas deur alle biebelse verhaelen uut et Oolde Testement. Tussen alle zaandskulpturen liggen oolde botters uut Elburg en staon echte bomen. Et is echt hiel biezunder. In et resteraant daore hewwe eerst wat drinken had mit wat lekkers d’r bi’j. Omdat et zo regende biwwe en mooie stattien Elburg niet ingaon, mar we hebben in Zwolle in de autoshowroom van Wensink keken. BMW-s en aander spul van ien of twie ton. Now ja, ik wil mezels aenlik wat geven veur Sunderklaos, dat ik zal dit es in me ommegaon laoten. We hebben vanaovend superlekker eten had in resteraant De Rustende Jaeger in Hooltpae. Veurtreffelik! Hieronder nog een foto van vandemiddag. Dit is een zaandskulptuur van de Farao van Iegypte en dit het vanzels te maeken mit et mooie verhael van Jozef die zo goed dromen uutleggen kon, Iegypte zodoende behoeddede veur een hongersnood en an et hof van de Farao kwam. In de skulptuur bin dudelik een maegere en een vette koe te zien. En dat allemaole van zaand! Jim kennen dat verhael grif wel. As kiend op ‘e zundagsschoele vun ik et al prachtig en ik vien et nog altied ien van de mooiste biebelse verhaelen.